SILBE NI HATA PANOLOTI “UM”

Pamasa na uja, nunga salpu sada taon na buruk jala taripar hita tu sada taon na imbaru, alai ianggo asi dohot holong nasian Tuhanta na so tupa mumpat jala morot sian hita jolma na tinompaNa. Di pardalanan ni ngolunta di na mandalani sada taon na gok asi ni roha di ari na naeng ro, na manghirim do hita tongtong di asi ni rohaNa manang songon ni dok ni parjamita, ndang ala na jinou ni tua tung ala ni asi ni rohaNa sambing do umbahen na dilehon.

Angkup ni i diigil roha do tongtong nang pe naung marsalpuan angka panorangion na marpardomuan tu partota ni hata Batak di taon naung salpu, anggiat nian rap marningot hita padimundimunhonsa tarlumobi ma ditongatonga ni ripe. Pamasa na uja molo satolop do hita di hata ondeng, naeng udutanta ma muse di ombas on ima na marpardomuan tu silbe ni hata panoloti um manang di hata Indonesia sisipan um manguduti hata ni parsiguriton di ari naung salpu, anggiat lam tu sirsirna hata ni parsiguriton on di hanalnalon ni ugari di bangso Batak.

Di hata ni parsiguriton naung salpu, nunga adong saotik hatorangan, nasa silbe ni hata panoloti um di hata na jinadihon gabe hata tudostudos manang di hata Indonesia sisipan um dalam imbuhan menyatakan suatu perbandingan. Tudosanna : tonggi – tumonggi = manis – lebih manis; timbo – tumimbo = tinggi – lebih tinggi; dao – dumao = jauh – lebih jauh. Adong do tongtong di hata Batak “un” dohot “an”; na marrumang tudostudos. Dia do imbar ni i sian silbe ni hata panoloti um?. Tudosanna : malo – ummalo – maloan. Tudosanna tu pandokan (jaha : paddohan): maloan dope ibana sian ho. Ummalo dope ibana sian ho (ia lebih pintar dari pada kamu). Pabidanghon dohot pabagashon na dua rangsa on tauduti di parsiguriton na mangihut.

Angkup ni na gabe tudostudos silbe ni hata panoloti um adong dope deba nari pamasa na uja di sintuhu dohot ondolanna hombar tu pangalaho ni sada horong dohot rumangna. Molo dadap pangarimangionta di sada hata Batak marhite angka pandokan, hata na niririt na mangondolhon silbe ni hata panoloti um na marharoroan sian hata bonabona manang dohot pandokan na asing saringar ni soara “um” gabe hata na marimpola manang di hata Indonesia bersifat puitis manang somal digoari “sastra”. Tudosanna : Sondang ima na marharoroan sian hata goargoar manang kata benda di hata Indonesia. Sondang ima cahaya ; nur. Tapamanat ma saotik gabe hata na jinadihon (imbuhan). Sinondang (sisipan in) = cahaya; terang. Marsinondang (bercahaya) ; manondangi = menyinari; menerangi. Sumondangi ima silbe ni hata panoloti “um” dohot hata panorangi “i”, alai “i” domu do sada hata surathonon, ndang gabe sumondang i, alana sada rangsa na hot (baku) do on di partota ni hata Batak. ……… Sumondangi hagolapon na di rohantai ………… d.u (dohot udutna) na nienet sian hata ni ende partondion (lagu-lagu rohani). Mangihuthon impola ni hata (sastra) hombar tu pangarimangion ni sian aji panurat di hata Indonesia : “Sinar kasih sorgawi”, ndada na holan menerangi kegelapan molo di pangantusion na somal di hata ondeng. Sumondangi (sinar kasih sorgawi), nda nunga hata na marimpola pamasa na uja?. (marudut dope)

Siaji panurat : Pangarimangi ni hata Batak di Bona Pasogit, maringanan di Simorangkir,
Kec. Siatas Barita Kabupaten Tapanuli Utara. Waldemar Simamora